Ru·utkuja, pringo puri ding·a ding·a cha·na ine cha hotelona napangon anga me·aparangni ka·kimchae golpoako chadikeaha.

“Da·ororode cha kapsakoba ‘cha ge·sa,’ puri gilsakoba ‘puri ge·sa’….. maiko agangen, ku·tangkon man·angtokjaengaha”

“Bi·sa mikkinamangba Englishkosa skichengenga jokona, baoni A·chikku namkuna. ‘Baita ge babu, one ma two?’ inesai!” saksa joraataha. Unon me·apa troska saksa bik agandapaha, “Indakanan angni demechik chongipa, B.A poraipilgipa mnisalo sata man·a. ‘Photo ge·bri’ ka·na nanga ine tangka bi·a!”

“A·chikku man·anggijagipararako sandie sattimgipa committee dongode namgenchimkon!” angni kattarang gam·angjaoba gisiktango agane, uamangni golpo a·bakuna ka·dingsmite mesokbaaha. Antigipino, ramasamo te·rik palako akkasa (galsa) ra·jolna gari dondike ong·katon angaba chagrongbebeaha. “Ge·sa sotdok… ge·gni ra·angode ritchasa donang… Ian ama baibai,” kni bokangpilenggipa me·chikma aganaha!

Nang·ni jakra-jakasio aganenggipa A·chikkuko nachil songe knatimbo: maiko knaenga? Ia chasongni A·chikku aro uko agangiparang dingtangbeaha ine sakantian gakguna nanggen. Ku·sik an·tangari apsane dongkamja; an·tangari dingtangroronaba man·ja. Mingsa ku·sikni bilakbatroroani aro gimaangania uko jakkalgipa manderangosa pangchaka.

Ia chasongo maiba maiba a·selrangchi ku·tangko name man·gijagipa Garorang dongbebea. Indiba ku·tangko man·ja dakmike ku·gipinko aganchapo ga·sunikgiparangba dongskaa! Bang·batanin ga·sunikgipa aro an·chingni gelna man·telgija jakkalenggipa English ku·sikoba pilakankode ‘ge·’ inpaja; indongarangko ma·eke channa A·chikkuode kattarang chong·doa, chano chansokja.

Ia websiteni bako Garo Classifier-rangni gimin Melkey Chisimni sea gnang. Classifierrang mongsongbate East Asian ku·sikrango bang·en gnang, aro indakgipa gunrangnan de·kadange mingknaa. East Asiani ku·sikrang inon Chinese, Japanese, Korean aro Tibeto-Burman ku·sikrangko man·gopa. A·chikkuba apsan ku·bipangoni ong·pae mamingkon chana minganion ma·ekate jakkalna classifierrang gnang; aro uarangchin Sino-Tibetan family treeni cheksio ong·paa ine sakki on·a. Indiba, aiao! uarang da·o gimaangengaha! Ku·tangna simsakjaode, haida, badiaba chasongode ku·bipangoni cheksi be·chrake ja·pang-ja·dil gri ong·rikgen!

Ia chasongo “dotsa, dingsa, pongsa, gilsa, ….” ine mingchape chananiko gimaatenganina chadamberangko mangmang jaksi todingjolode ong·skajawa! Kni matram pe·giparangoniba mingantinan ge·sako jakkalaigiparang bang·a! Indake agangopna man·gen, ku·tangko name rongtale agana man·ania bilsi chonbata ba gipibatao pangchakja indiba ku·tangna ka·saani aro gamchatnike jakkalronganiosa ong·baa.

Garo Classifiers. Jatni Gam: Cultural Heritage. Uarang griode an·ching “bol sa, chibima sa” inesa aganna nanggenchim. Garoni classifierrangko jakkalon nounko mingchapgijaba sentence ong·atna man·a, jekai:

Q: “Badita sak re·baenga?”
A: “Sakbri, sakbonga.”

‘Sak’ inahaon mandena jakkagipa classifier ong·ani gimin “Badita sak manderang re·baenga?” ingijaba miksonganiko u·ina man·a. Uko u·isotna amani bilara ku·tangni nokgipa ong·aniko mesokskaa. Mingmingantina chanani kattarangko on·chape aganna ba sena changode A·chikkuni knatoani, su·uani aro bil gnanganiko nikgen. Angni sandikolame see rakkianio ming ritchasa sotbongana baten Garo classifier-rangko man·aha, aro ma·sisokgijao baditan dongkuenggen! Badita mingmancha A·chikkuo chananirang dongenggen. Hai da·alonin sandie nie jakkalrongna aro ripingna. Skanggipao an·ching jakni bakrangoni a·bachengna.

Jakni bakrangchi chanbewal
• Jaksi: jaksiko toe, jaksisa, jaksigni ine chana
• Jakpa: jakpako badalate (jaksimako man·chape)chananiko jakpasa ina.
• Kru: jaksima ku·chotoni miktora ku·chotona kringate toako kru minga.
• Jakkep: jakpako rim·kepe jeko man·rika ukon ‘jakkep’ minga, jekai merong jakkep.
• Jakchom: jakpa samgni chachake chaka kakketko jakchom ina.
• Mik: jaksku greng bon·chotaoni jaksi miktoraona toaniko mik minga.
• Mikjaktom: jakko jaktome, unoni jaksku greng bon·chotaona chanani.

LANGUAGE CLASSIFICATION
A·gilsako badita ming ku·sikrang gnang ine saoba sing·ode rang·san aganchakna man·janaba gnang. Beben, da·alona kingking a·gilsako badita ming ku·sikrang gnang, namekae channa amja aro man·jawa! Linguistsrangni nigope aganani gita a·gilsako ming hajalsnimang ku·sikrang gnang. 1971 bilsio nikani gita an·ching Salgro-Salaram a·dok mangmangon ming 220 ku·sikrang gnang. A·gilsak gimikni pilak ku·sikrangko man·gope ku·bichongrangona indake suala:—

A·chik ku·sik Tibeto-Burman bipekni cheksio ong·a; Tibeto-Burman bipek Sino-Tibetan ku·bichongoni pekwatskagipa dal·gipa bipek ong·a. Language Classificationo Sino-Tibetan ku·bichongko pekgni dake ma·ekata:—

(i) Chinese
(ii) Tibeto-Burman

Sino-Tibetan ku·bichongko classify ka·ako diagram sale niangna. Indiba ian ku·sikrangko maikae classify ka·a uko mesokanisan ong·aigen. Dingtang dingtang linguist aro scholarrangni classify ka·anirang gnang. Ka·mao mesokgipa classificationni PDFko nina iano man·gen.

 

(Tibeto-Burman-Bodo-Garo ku·sikrangoni pekwatbaagipa minggipinara uan an·chingni A·chik ku·sik. Ia dolni ku·sikrangko a∙gilsakni dingtang dingtang biaprango agantoka. Da·alonan a·gilsak chigilboo ia Sino-Tibetan ku·sikni dolrangran bang·batsranggipa ong·kuenga. Ia ku·sikni dolo ming 449 dal·dalgipa ku·bipekrang gnang.)

Bilnang Raka K. Sangma

Published: Jarongpang || Vol 1 No 2 || Dec 2017